MIABOT na sa dakbayan sa Digos ang 18 ka mga bag-ong ekipo lakip ang duha ka mga bag-ong ambulansiya sa City Disaster Risk Reduction and Management Center (CDRRMC) ug dungan kining gi-bendisyonan, Huwebes sa buntag.

Gipangunahan ni Digos City Mayor Joseph Penas ug mga opisyal sa dakbayan ang seremonyas human gilaray atubangan sa Rizal Park ang mga bag-ong kahimanan.

Ang mga ekipo gilangkuban sa mga payloader, grader, bulldozer ug dump trucks nga maoy gamiton alang sa nagkadaiyang proyektong imprastraktura sa dakbayan ug subay sa programang “Build, Build, Build” sa nasyonal nga kagamhanan.

Sumala ni City Engr. Algeir Ramos, panahon nga makabaton ang siyudad og mga bag-ong imprastraktura sanglit karaan na kaayo ang ilang mga ekipo nga ginagamit sa mga paghimo og dalan.

Kabahin ang maong pundo sa giutang nga P400 milyones sa Development Bank of the Philippines diin ang P170 milyones gigahin sa gitukod nga Digos City Business Center ug P30 milyones nga sanitary landfill.

Gilayon sab nga gitubag sa mayor ang mga atake kaniya sa mga bokador sa kalabang politiko nga usa kini ka pamolitika.

“Politics is very divisive, walay laing katuyuan ning pikas kampo gawas sa pagbahin-bahin ug pagbungkag sa katawhan sa Digos,” asoy sa mayor.

Matud ni Peñas nga dili na siya matingala kon giadlaw-adlaw siya pag-atake sa mga bokador sa mga kaatbang human siya mi-anunsyo nga modagan pagka-gobernador sa probinsiya.

“Even sa bag-ong city hall, I may not be able to sit on this new building, but this is for the generation to come, this is all for the people of Digos,” tataw niini.

Alang niya, nga inig human sa iyang termino modagan siya og taas nga posisyon apan di pa pinal tungod kay mag-agad kini sa partidong Hugpong ng Pagbabago ni Davao City Mayor Sara Duterte-Carpio ug magkuyog na sila ni kanhi PNP Chief ug Bureau of Corrections Director Ronald “Bato” dela Rosa.

“The best is yet to come for the city of Digos and for the whole province of Davao del Sur,” ni Peñas.

Gidason niini nga di siya matarog bisan og unsa pa ang mga tumo-tumo sa mga bokador ngadto kaniya tungod kay nakita sa katawhan ang kamatuoran kon unsa ang mga kausaban nga nahitabo sa dakbayan ug mao sab kini ang mahitabo sa tibuok probinsiya pag-abot sa gitakdang panahon. (Orlando B. Dinoy)