MOKANTIDAD sa P350 mil ang gituohang shabu nga nakuha sa posisyon sa duha ka mga lalaki ug usa ka babaye atol sa gilusad nga buy-bust operation sa Sta. Ana Police Station alas 2:50 sa kaadlawon, Martes, didto sa Lakatan Street, Barangay Wilfredo Aquino, Agdao District, Davao City.

Sa operasyon, nasikop si Patrick Ferenal Macavinta, 31 anyos, negusyante ug molupyo sa Gumamela Street, Kasilak Bucana, Davao City; Adrian Paelmarin Ape, 33 anyos nga taga Mabini, Davao de Oro; ug usa ka alyas Ate, 42 anyos, nagpuyo sa Jade Valley Home, Barangay Tigatto, Davao City.

Sumala ni Sta. Ana police station commander Police Major Benkalin Baluan nga dugay na nilang gipanid-an ang ilegal nga aktibidad sa mga nahisgutan, hangtud nga miabot sa punto nga mobaligya na sila og druga sa nagtakuban nga pulis.

Dagkong pakite sa gituohang shabu ang nakuha sa posisyon sa mga dinakpan, lakip na ang usa ka pusil ug ang sakyanan nga gigamit sa operasyon.

Anaa sa 25 gramos nga gituohang shabu nga nakasako sa pakite nga dunay timbang nga 25 gramos ang nasakmit sa kapulisan.

Mga nahisgutang suspek gipailawom na sa Summary Inquest Procedure sa kasong pagsupak sa Republic Act 9165 kun Comprehensive Dangerous Drug Act of 2002 didto sa korte. (Jeepy P. Compio)