KANTIDAD sa P78,000 nga koleksyon nga kuwarta ug importanteng mga gamit sa mga delivery rider ang natangag sa duha ka mga tulisan sa J&T Express Hub didto sa Purok Caimito, San Isidro Street, Barangay Gredu, Panabo City.

Gibutyag sa usa sa mga saksi nga ginganlan og Robert Ali Razul, 32, minyo, quality assurance personnel sa J&T ug molupyo sa Purok Rambutan, Barangay Datu Abdul Dadia sa nahisgutang siyudad nga pasado alas 8:15 sa gabii niadtong Dominggo nga samtang sila nagpahigayon og inventory, uban sa laing mga empleyado nga mga delivery riders, duha ka wala mailhing mga lalaki ang misulod sa establisemento ug mideklarang tulis.

Gihulagway nga ang usa sa mga suspek nga dakuon ang lawas ug nagsul-ob og kolor itom nga tube mask nagtion og mubo nga klase sa armas nga gituohang .45 caliber pistol.

Samtang ang laing usa nga niwangon ug nagtabon og kolor puti nga panapton sa nawong nagdala sab og gituohang .38 caliber revolver.

Malampusong nakuha sa mga suspek ang koleksyon nga kuwarta nga balor og P78,318.50 ug personal nga mga gamit nga iya sa mga delivery riders nga anaa niadtong higayona.

Ug human sa gihimong pagpanulis, yano lang nga milakaw ang mga suspek paingon sa wala masayring direksiyon.

Dugang pagpanubay ang gilusad sa mga kapulisan sa Panabo City Police Station aron nga mailhan ug madakpan ang mga suspek.