PERSONAL nga atraso gisubay karon sa mga awtoridad nga posibleng maoy motibo sa pag-ambush-patay sa kagawad sa Barangay Kakar, Datu Odin Sinsuat, Maguindanao Province.

Nahitabo ang pagpang-ambush alas 6:02 sa gabii, Miyerkules, Enero 13, 2021.

Ang biktima mao si Buagas Meto alyas Datu Bogie, 47, minyo, giingong sakay sa iyang gimaneho nga DT Yamaha nga motorsiklo nga dunay plaka YD-5889 gikan sa Cotabato City ug pauli na unta sa ilang balay.

Apan sumala ni Datu Odin Sinsuat Chief of Police Major Rommel Dela Vega nga pag-abot niini sa Barangay Bugawas sa maong lungsod, kalit siyang gibanhigan sa wala mailhing armadong lalaki.

Patay gilayon ang biktima nga natusak-tusak sa bala sa nagkadaiyang parte sa lawas.

Bisan tuod kon duna nay gidudahan ang pamilya sa biktima nga nagpaluyo sa krimen, apan kapulisan padayon pang nagsusi sa kaso ug matumbok ang tinuod nga mamumuno. (Edgar E. Fuerzas)