SUBO man apan nakadawat ra sab sa kamatuoran ang usa ka 49-anyos nga ginang human natunaw ug daw bula nga nawala ang iyang gi-invest sa Rigen Marketing niadtong tuig 2019.

Nabanhaw sa hunahuna kining tanan ni Jocelyn Plenos, human nasikop sa Southern Mindanao Regional Office sa National Bureau of Investigation (NBI-Semro) si Kharl Auditor usa sa nagpaluyo sa maong money investment scheme nga mibiktima sa libuan ka mga tawo.

"Bisan pa og nasikop na ang mga Auditor brothers pero dili bastante ang kantidad sa kuwarta nga ilang nakuha sa mga tawo. Pero kay risgo lagi daw sa pag-invest ani, mao nang nadawat naman lang pod nako ug sa kadaghanan, at least nasikop sila aron dili na kabiktima, basin naa na pod silay lain nga paagi sa modus nga maoy angay bantayan sa awtoridad," ingon ni Jocelyn nga nahinabi sa Superbalita kagahapon pinaagi sa Messenger.

Lahi sab ang bersiyon ni George Delfin, tag-iya og usa ka vulcanizing shop sa Quezon Boulevard, Davao City, alang niya nga wala nay pulos ang pagkasikop sa mga primary suspect sanglit dili na mabalik ang kuwarta sa mga tawo.

"Useless na lang kaayo, mora'g kanang gipatuman na lang gyud nato ang balaod, apan mora'g pinaplastar na lang, di gyud tong kasagsagan gani sa mga pay-in dapat didto gyud mipapel og maayo ang awtoridad sa pagsikop nila, daghan man kini sila, di lang Rigen, pero ang sa Rigen ra gyod ang gipangdakop,” opinyon ni George, 62 anyos.

Sumala sa NBI, si Auditor nag-atubang og kasong Estafa, Syndicated Estafa, ug Large Scale Estafa diin ning kasamtangan anaa sa ilang kustodiya. (Jeepy P. Compio)