HUGOT nga gikonderna sa han-ay sa kapulisan sa Police Regional Office (PRO)-Davao Region ang pagpusil-patay sa brodkaster nga si Orlando "Dondon" Dinoy.

Dominggo sa buntag, Oktubre 31, 2021, pinaagi sa Facebook page sa PRO-Davao Region, ilang gipagula ang hulagway nga naa si Dinoy uban sa ilang mga pulong sa pagkondena sa hitabo.

"Police Regional Office 11 (Davao Region) condemns in the highest form the killing perpetuated against media practitioner, Orlando 'Dondon' Dinoy. Killing of any form is not being tolerated in Davao Region; and PRO 11 vows to exert all its effort to identify and charge the perpetrator on the crime they committed," pamahayag sa PRO-Davao Region.

Sa report sa Bansalan Municipal Police Station, mga alas 6 sa gabii, Sabado, Oktubre 30, 2021, gipusil si Dinoy sud sa iyang giabangan nga apartment sa Mother Ignacia Village, Barangay Poblacion Uno, Bansalan, Davao del Sur.

Gamit ang kalibre .45 nga pistola sa pagpusil sa mamumuno, dead on the spot dayon si Dinoy nga nakahiagom og daghang mga samad sa kalawasan.

Sumala sa mga silingan, nakadungog sila og unom ka mga buto sa pusil. Sa ilang pagtan-aw sa girentahan ni Dinoy, nahagba na ang biktima ilawom sa dining table.

Nasayran subay sa saysay sa testigo nga human sa hitabo, daling misakay ang mamumuno sa motorsiklo nga naghulat sa gawas sa apartment.

Gihulagway ang mamumuno nga dunay husto nga pamarog, nakasuot og kalo nga itom, naka-short pants ug naka-t shirt.

Ang Scene of the Crime Operatives (Soco) sa Provincial Crime Laboratory Office sa Digos City nakahipos og unom ka mga basiyo sa bala, dunay usa ka bala ug usa sab ka deformed nga bala.

Si Dr. Earl Felix Vicente sa Centeno Medical Specialist Hospital maoy nagdeklara nga patay ang biktima.

Blangko pa ang kapulisan sa Bansalan Municipal Police Station diha sa ilang imbestigasyon aron mailhan ug masikop ang mamumuno samtang wala pa sab mi-establisar og kongkreto nga motibo ang kapulisan labot sa krimen apan dili suma pa molayo ang anggulo nga personal nga bangi.

Walay init nga istorya

Gipaambit sab sa Newsline Philippines pinaagi sa Chief Executive Officer nga si Editha Caduaya nga walay init nga mga istorya si Dinoy nga mao unta ang makuhaan og ideya alang sa pagpahigayon sa imbestigasyon diha sa anggulo.

Sumala ni Caduaya nga pulos lamang developing stories sa panghitabo sa palibot sa Davao del Sur ug Davao Occidental ug mga police report ang ginabalita ni Dinoy ug niya pa walay mga bug-at nga isyu nga gibatbat si Dondon sa iyang mga istorya.

Si Dondon Dinoy nahimong correspondent sa Davao del Sur ug Davao Occidental alang sa Newsline Philippines human sa taas nga katuigan isip correspondent sa SunStar Davao Superbalita.

Sa pagsuwat ning balita Dominggo, gipahiluna sa mga kabanay ang patayng nga lawas ni Dinoy samtang nagpadayon ang kapulisan sa Bansalan sa ilang makuti nga imbestigasyon sa krimen.