PERSONAL nga bikil ang gituohang motibo sa pagtipi sa drayber sa traysikel nga gipusil sa Barangay Visayan Village, National Highway, Siyudad sa Tagum, Davao del Norte alas 12:23 sa udto, Hulyo 17, 2021.

Ang biktima nga si Arvin Comaling, molupyo sa Purok 27, Ganiran, Madaum sa maong siyudad, nagmaneho sa iyang tricycle padung sa usa ka mall.

Apan pag-abot sa nahisgutang barangay, gipusil siya sa wala mailhing armado nga sakay sa wala matinong motorsiklo.

Human sa pagpamusil, ang suspek nagdaling mikagiw palayo sa wala masayring direksiyon.

Sumala sa Tagum City Police Station, gideklarang patay na ang biktima sa Davao Regional Medical Center human makahiagom og usa ka samad pinusilan sa walang bahin sa tangkugo.

Samtang gilusad na sa Tagum police ang hot pursuit operation batok sa suspek aron nga madakpan ug pasakaan og kasong pagpatay. (Dexter T. Visitacion)