POSIBLENG gidumtan ang biktima nga giingong real estate broker ug negosyante nga gipusil-patay Lunes sa hapon, Septyembre 30, didto sa Purok 3, Peñano Street, Calinan, Davao City.

Ang biktima usa ka giingong manager ug franchisee sa RTM Investment scheme sa Panabo City ang biktima nga si Elizabeth Lanticse Mantalaba, 29-anyos.

Dead on the spot ang biktima dihang pusila sa wala mailhing mamumuno tumong sa ulo samtang paabli na kini sa iyang Toyota Hilux nga naka-parking sa Peñano Street.

Wala gisalikway sa kapulisan ang anggulo nga pagdumot ug personal nga bangi ang posibleng motibo sa krimen.

Tulo ka mga basiyo sa bala sa kalibre .45 ang narekober sa Scene of the Crime Operatives sa nahitaboan.

Ang patay nga lawas sa biktima gidala sa morgue sa Angel Funeral Parlor sa Calinan, samtang ang kapulisan padayong naghimo og lawom nga imbestigasyon sa hitabo. (Jeepy P. Compio)