PANABO CITY, Davao del Norte -- Gilubngan og bala ang nawong sa usa ka 44-anyos nga lalaki human kini pusila sa wa mailhing mamumuno alas 6:30 sa gabii, Marso 17, 2022, didto sa Purok 3, Cogon, Barangay Jose P. Laurel.

Ang Panabo City Police Station nag-ila sa biktima nga si Thomy Anatacio Capitli, 44-anyos, panday, ug nagpuyo sa New Bataan, Davao de Oro.

Subay sa inisyal nga imbestigasyon sa Panabo police, nasayran nga pauli na unta ang biktima sa ilang balay dihang kalit miabot ang mamumuno sakay sa motorsiklo dayon namusil.

Gipunting sa suspek ang nawong sa buktima, hinungdan nga nanghilam-os kini og dugo dayon natumba.

Dali sab nga gidala sa ospital ang biktima, samtang ang mamumuno daling misibat padung sa wa matino nga direksiyon.

Padayon ang gihimong imbestigasyon sa kapulisan sa maong krimen.