NAKATABANG og dako ang pagpanghatag og face masks gikan sa buhatan ni Davao City First District Representative Paolo Z. Duterte kagahapong adlawa, Pebrero 3.

Mokabat sa 10,000 ka mga face masks ang gipang-apud-apod didto sa Davao International Airport, Ecoland Bus Terminal, Southern Philippines Medical Center (SPMC), City Hall, Sangguniang Panlungsod ug mga barangay halls sa 54 ka mga barangays sa nahisgutang distrito.

Sumala ni Lorna Masong, 54, pasyente sa SPMC, nga dako kaayo iyang pasalamat gumikan sa miaging adlaw pa wala na siya'y mapalitan og face mask.

"Nagpasalamat gyud mi kang Cong. Pulong kay lisod kaayo ug hadlok ang sitwasyon, magkasakit mi aning walay magamit nga face mask nga mosulod sa ospital labi na nga dunay mikatag karon nga virus," ingon sa Ginang.

Didto sab sa Davao City Overland Transport Terminal (DCOTT), daghang ang nagpasalamat nga mga drayber, konduktor ug mga pasahero gumikan nakadawat sila og libre nga face mask.

"Nalipay mi kay wala naman gud kay mapalit sa botika nga face mask. Salamat sa panghatag, labi na kang Cong. Pulong Duterte," matud sa drayber sa Yellow Bus Line padung Koronadal City.

Ang residente sa Barangay Tigatto, Buhangin Davao City nga gikan sa Cebu City usa sab sa mga nakadawat og libre nga face mask paggawas niya sa arrival area sa Francisco Bangoy International Airport sa Davao City kagahapon.

Ang maong aktibidad maoy tubag sa kakuwang sa suplay nga mapalit unta sa mga tawo diha sa mga botika aron malikayan ang novel coronavirus (2019-nCov).

Hinuon, walay natala nga nagka-coronavirus sa Davao City gawas sa usa nga unang nadeklara sa Department of Health nga anaa karon sa San Lazaro Hospital sa kaulohan.

Sa mosunod nga mga adlaw, magpadayon ang pagpanghatag og mga face mask sa buhatan sa batan-ong kongresista ning unang distrito ning dakbayan. (Jeepy P. Compio)