TAGUM CITY -- Giangkon sa Tagum City Police nga dunay nagpatala kanila nga usa ka lalaki kinsa concerned citizen gumikan sa iyang nakita nga giuban sa giingong usa ka pari ang babaye sud sa usa ka balay.

Nahitabo ang insidente sa miaging mga adlaw sa usa ka subdivision sa Tagum City.

Gisaysay sa Tagum City police nga igo lamang nila gi-blotter ang hitabo apan wala na nahimoan og spot report sanglit concerned citizen ang mipahibalo ug wala sab maklaro kung kinsa ang gireklamo nga giingong pari.

Una niini, natahap ang maong concerned citizen human perte ka sweet nga nag-uban pasulod sa balay ang duruha.

Dihang gisubay niini kauban sa usa nga gisuginlan, ilang gihap-an ang lawak diin ang usa okupado sa pagkuha og video footage pinaagi sa cellphone.

Daw namatikdan sa duruha nga giukoy sila, hinungdan nga mitago ang pari ilawom sa katre kay nasayran niini nga gi-videohan sila.

Giharong sila sa babaye ug gipangsultihan ang duruha nga walay malisya nga nahitabo kanila apan bisan pa man niana, mipahibalo gihapon ang concerned citizen ngadto sa kapulisan.

Nasayran nga ang maong babaye dunay kapuyo nga usa suma pa ka overseas Filipino worker subay sa istorya nga migula sa dxDC RMN Davao. (Jeepy P. Compio)