DIGOS CITY -- Gitinuod gyud sa kapulisan ang pagpanakop sa mga pasaway nga indibiduwal sa dakbayan ilawom sa programang "Oplan Patagam."

Sa uwahing operasyon niadtong Miyerkules, Hulyo 8, 73 ka indibiduwal ang na-isyohan og citation ticket apil ang Temporary Operator's Permit (TOP) human milapas sa balaod trapiko.

Sumala ni Lieutenant Colonel Vici Anthony Tababa, hepe sa Digos City Police Station, nga apil sa ilang gi-implementar ang Republic Act 4136 kun Land Transportation Code of the Philippines (LTO) sanglit na-monitor nga daghan ang mga milapas niini.

Laing 30 ka indibiduwal ang nadakpan tungod sa wa pagtuman sa social distancing ug padayong mihimo og panagtapok.

Aduna say 15 ka indibiduwal ang nasikop sanglit naglaroy-laroy nga wa magsul-ob og face mask.

Matud ni Tababa nga ilawom sa new normal, angayang batasanon na gyud ang pagsul-ob og face mask ug obserbahan ang social distancing.

Apan namatikdan nga bugtong ang siyudad sa Digos lamang ang mihimo sa "Oplan Patagam" sanglit ubay-ubay na ka indibiduwal sa ubang dapit sa Davao del Sur ang daw gibalewala ang coronavirus disease (Covid-19) sanglit wa motuman sa mga protocols sa Inter-agency Task Force on Covid-19. (Orlando B. Dinoy)