KIDAPAWAN CITY -- Kalisang ang gibati sa katawhan sa probinsiya sa Cotabato sa adlaw-gabii nga nasinatiang aftershocks sa linog.

Mulungtad pa og unom ka bulan ang mga aftershock sa 6.3 magnitude nga linog nga sentrong miigo sa Tulunan, North Cotabato.

Kini mismo ang gikompirma ni Philippine Institute of Volcanology and Seismology (Phivolcs) Kidapawan chief, engineer Hermes Daquipa.

Gipanghimakak sab ni Daquipa ang mikatag nga taho nga posibleng moigo ang magnitude 8 nga linog sa probinsiya sa Cotabato.

Giklaro sa opisyal nga kini dakong bakak og fake news gumikan hangtud karon wala pay kagamitan ang Phivolcs sa pag-detect sa nagsingabot nga linog.

Panawagan ni Daquipa sa katawhan nga kung dunay linog dili magpanik, mutago sa luwas nga dapit, mag-amping, alesto ug mag-ampo.

Padayon sab ang pang-apud-apod og hinabang sa lokal nga panggamhanan sa probinsiya nga gipangulohan ni acting Governor Emmylou Taliño-Mendoza sa mga dapit nga grabeng giigo sa linog.

Anaa na sab sa state of calamity ang lungsod sa Makilala, M’lang og posibleng mosunod niini ang Tulunan aron magamit ang calamity fund sa mga biktima sa pagtay-og sa yuta. (Edgar Fuerzas)