DATU MONTAWAL, Maguindanao -- Gipang-ibot sa mga miyembro sa Moro Islamic Liberation Front (MILF) ang mga tanum nga marijuana sa nadiskobre nga plantasyon alas 10:00 sa buntag niadtong Dominggo, Enero 5, 2020, sa probinsiya.

Nanguna sa pagpangibot sa liboan ka punoan sa marijuana si Hadji Abdullah Hamsa alyas Kumander Transiver sa 128th Base Command sa MILF didto sa utlanan sa Barangay Dungguan, Datu Montawal ug Pagalungan sa maong probinsiya.

Mga inibot nga mga punoan sa marijuana gitunol sa MILF ngadto sa mga sakop sa Datu Montawal Municipal Police Station, 7th Infantry Battalion, Philippine Army, 602nd Brigade ug kang Barangay Dunguan Chairman Safrullah Buday Alhaj.

Mismo ang mga molupyo sa maong dapit ang nagpaabot og impormasyon sa MILF, lakip na mga opisyal sa barangay sa maong plantasyon.

Gawas sa mga dagko nang mga punoan sa marijuana, duna pay mga binhi nga puwede pang itanum nga ilang nasakmit.

Kahinumdoman nga gipalig-on sa lokal nga kagamhanan sa nahisgutang lungsod nga gipamunoan ni Mayor Datu Otho Montawal sa pakig-alayon sa militar, kapulisan, Philippine Drug Enforcement Agency ug MILF ang kampanya batok sa gidiling druga.

Andam ang local government unit nga mohatag og ganti ngadto sa mga makadakop, patay man o buhi, sa mga tawo o grupo nga nalambigit sa illegal drug trade. (Edgar E. Fuerzas)