KIDAPAWAN CITY -- Gipahugtan pa ang seguridad sa probinsiya sa Cotabato sa pagbisita sa pinakataas nga lider sa nasud karong adlawa, Lunes, Disyembre 30, 2019.

Direkta nga bisitahon ni Presidente Rodrigo Duterte ang M’lang, North Cotabato.

Ipahigayon ang programa duol sa M’lang National High School uban sila Cotabato Governor Nancy Catamco, Vice Governor Emmylou ”Lala” Mendoza, M’lang Mayor abogado Russel Abonado ug ubang opisyal sa probinsiya.

Ang presidente mag-apud-apod og hinabang sa mga molupyo nga grabeng naapektuhan sa sunod-sunod nga linog sa probinsiya sa Cotabato ug titulo sa yuta o Certificate of Land Ownership (CLOA).

Makadawat og tseke kadtong mga pamilya nga namatyan sa linog, mga naangol ug nawad-an sa pinuy-anan.

Uban sab sa presidente sila si Senador Christopher Lawrence “Bong” Go, Mindanao Development Authority (Minda) Chair ug kanhi Department of Agriculture Secretary Manny Piñol ug ubang opisyal sa kagamhanan.

Sa kasamtangan, plantsado na ang seguridad nga ipatuman sa pagbisita sa presidente sa M’lang, Cotabato karong adlawa. Edgar E. Fuerzas