PASAKAAN og kaso nga paglapas sa Republic Act 9165 o Comprehensive Dangerous Drugs Act of 2002 ug administratibo ang usa ka pulis nga namaligyag shabu nga nadakpan alas 4:15 sa hapon, Sabado, Nobyembre 20, 2021, sa Dakbayan da Cotabato.

Naila ang suspek nga mao si Police Corporal Jomar Moyet Chio alyas "Jomar" nga nadestino sa Sultan Kudarat Municipal Police Station sa Sultan Kudarat, Maguindanao.

Sumala kang Cotabato City Police Director Colonel Rommel Javier nga nagpahigayon sila og buy-bust operation uban ang mga sakop sa Sultan Kudarat Municipal Police Station, ug Regional Highway Patrol Unit-Bangsamoro Administrative Region (RHPU-BAR) sa Gutierrez Avenue, Barangay Rosary Heights 7 sa dakbayan.

Atol nga gitunol sa suspek ang shabu sa mga asset sa pulis, didto na siya gidakop.

Narekober gikan sa posisyon sa pulis nga drug pusher ang buy-bust money, 9-millimeter pistol nga isyo sa iyaha, mga bala, magasin ug shabu.

Gikanayon ni Philippine National Police-BAR Regional Director Bregadier General Oden Ugale nga dugay na niya nga gimando ang pagpaniid sa mga pulis nga nalambigit sa gidiling druga ug pagtanggal sa serbisyo ang mahimong silot sa ilaha, mag-atubang sa kaso ug pagkabilanggo.

Ang suspek kasamtangang gibalhog na sa custodial facility sa Police Regional Office-BAR ug padayon nga giimbestigahan.