KIDAPAWAN CITY -- Sakop sa dakong drug syndicate ang nadakpan nga drug pusher kinsa giingong miyembro sa Barangay Peacekeeping Action Team (BPAT) alas 10:00 sa buntag niadtong Miyerkules.

Giila ang suspek nga si Randy Arida Manto, 38, minyo, nagpuyo sa Barangay Tumbras, Midsayap, North Cotabato.

Sumala kang Midsayap Chief of Police Lieutenant Colonel John Miridel Calinga nga nagpahigayon og drug buy-bust operation ang mga sakop sa Philippine Drug Enforcement Agency (PDEA)-Soccsksargen uban ang Midsayap Municipal Police Station sa national highway sa Purok 1 Rose B, Barangay Nes sa maong lungsod.

Sa diha nga akto nang itunol ni Manto ang shabu sa PDEA asset, giambakan na siya og giposasan.

Nakuha sa posisyon sa suspek ang duha ka dagkong pakite sa shabu nga gisulod sa paper bag nga nagkantidad og P680,000, lakip na ang buy-bust money.

Gikanayon ni PDEA-Soccsksargen Director Naravy Duquiatan nga si Manto nalambigit sa large-scale illegal drug trade sa North Cotabato ug Maguindanao Province.

Tingkagol ang suspek sa selda sa Midsayap MPS ug gipasakaan na og kasong kalapasan sa Republic Act 9165 o Comprehensive Dangerous Drug Act of 2002. (Edgar E. Fuerzas)