SUWERTE nga wa maugdaw kay daling natabang ang pagpalong sa kalayo human kalit midilaab ang usa ka pick-up nga sakyanan sa Shrine Hills, Matina, Davao City pasado alas 10 kagahapon sa buntag.

Sa impormasyon nga nahipos sa Superbalita gisaysay ni Senior Fire Officer (SFO) 2 Dexter Avendanio, investigator sa Talomo Fire Station, nasayran nga nag-leak ang exhaust manifold sa ubos nga bahin sa maong sakyanan rason sa pag-ulbo sa kalayo.

Ang hitabo naagian sa usa ka LPG delivery truck ug gilayon nilang napalong ang kalayo gamit ang fire extinguisher.

Gibutyag sa Talomo Fire Station nga anaa sa P30 mil ang damyos sa hitabo uban sa pahimangno sa kabomberohan ngadto sa mga motorista nga kanunay nga sutaon ang kondisyon sa ilang sakyanan aron malikay sa peligro.

Ubay-ubay na sab ang natala sa kabomberohan nga mga sakyanan nga kalit lamang mo-aso ug modilaab diha sa kadalanan. (Jeepy P. Compio)