PIGCAWAYAN, North Cotabato -- Wa nay nahimo ang usa ka sarhento sa militar gawas sa pagkuyog nga malinawon sa mga awtoridad human nga gironda ang iyang balay.

Ang pagronda sa balay sa suspek nga si Sargeant Teddy Cogo Paltinca, 42, minyo, nadestino sa 34th Infantry Battalion, Philippine Army nahitabo didto sa Barangay Capayuran, Pigcawayan, alas 9:30 sa buntag niadtong Lunes.

Sumala kang Superintendent Bernard Tayong, tigpamaba sa North Cotabato Police Provincial Office, nga gironda sa hiniusang puwersa sa Philippine Drug Enforcement Agency (PDEA)-Soccsksargen ug Drug Enforcement Unit sa Pigcawayan Municipal Police Station ang balay sa sarhento base sa search warrant nga giisyu sa korte.

Nakuha sulod sa balay sa sundalo ang usa ka kalibre .45 nga pistola, usa ka 22 caliber revolver, mga bala, walo ka pakite sa shabu ug kuwarta nga kantidad og P76,700.

Matud ni Superintendent Tayong nga dugay na nga gipanid-an sa kapulisan ug PDEA si Paltinca nga namaligya og shabu.

Hinuon gihimakak kini ni Paltinca ug nagkanayon nga dili iya ang shabu nga nakuha sulod sa iyang balay ug planted lamang sa raiding team.

Gisang-at na ngadto sa korte ang kasong kalapasan sa Republic 9165 o Comprehensive Dangerous Drug Act of 2002 ug RA 10591 o Illegal Possession of Firearms batok sa suspek. (Edgar E. Fuerzas)