ANAA na sa luwas nga kahimtang ang 145 ka mga estudyante sa Crossing Bayabas National High School sa Toril District, Davao City human nangalipong atol sa ilang pagpanggawas sa ilang siringan (lawak) atol sa natigayong linog kagahapon sa buntag.

Subay sa report sa Davao City Police Office (DCPO) alas 8:40 sa buntag Miyerkules, Hulyo 10, daghang mga tinun-an sa tunghaan ang gipangtabang sa mga medic team ug sa Central 911 human nang-reklamo og kalipong atol sa ilang pagpanggawas padung sa school grounds.

Sa 145, 98 niini nibalibad na nga dad-on sa ospital apan giatiman na lang sa lugar, 39 gihatud ngadto sa Malta Hospital, 3 gihatud ngadto sa Guadalupe Hospital, 3 gihatud sab ngadto sa St. John Hospital ug laing duha giatiman sa Bureau of Fire Protection (BFP) ug gihatud ngadto sa Southern Philippines Medical Center (SPMC).

Nagtinabangay nga mga rescuers ug responders sa pag-atiman sa mga estudyante mao ang Central 911, Eagles, BDRRMC Matina Crossing, BDRRMC Mintal, Victories, Torvo, BDRRMC Baliok, BDRRMC Crossing Bayabas, mga pulis ug ang BFP.

“Initial investigation disclosed that said student experienced extreme fear that cause them to stampede towards lower grounds after the earthquake that took place at about 8:30 AM today,” tipik sa mabasa sa pamahayag gikan sa tunghaan pinaagi sa ilang official Facebook.

Giklaro sab sa tunghaan nga dili tinuod ang mikatag nga taho nga dunay stampede nga nahitabo atol sa evacuation.

“CROSSING BAYABAS NHS IS SAFE: Gusto lang ipaklaro sa among tulunghaan nga DILI TINUOD ug FAKE NEWS ang mga nanggawas nga balita ug istorya,” dugang sa post.

Gilimod sab sa tunghaan ang mikatag nga istorya nga dunay nahugmak nga building gumikan sa linog, nasunog nga mga classrooms ug giingong dunay nasudlan og espiritu.

“Ang mga panghitabo ganina epekto lamang sa aftershocks na atong nasinati diri sa atong dakbayan. #OurSchoolisSafe,” dugang pa.

Nagduda ang netizens ug wala na mituo sa hitabo sanglit tulo ka tuig ang milabay nahitabo sab sa maong tunghaan ang dul-an 20 ka mga tinun-an ang nasudlan og espiritu human giingong resulta sa pagpaputol sa usa ka karaan nga kahoy sa maong tunghaan.

“Drama na lang ni sa mga estudyante seguro kay before naa kuno nasudlan og espiritu, diay na-found out nga nagsabot ang mga bata kay ting-exam,” sulti sa usa ka netizen.

Natala sa Philippine Institute of Volcanology and Seismology (Phivolcs) ang 140 ka mga aftershocks sa nasampit nga linog.

Hinuon walay nakabsan nga kinabuhi sa maong hitabo, apan dunay mga nangaguba nga gambalay sa laing dapit ning rehiyon. (Jeepy P. Compio/Juliet Riveta0