KIDAPAWAN CITY -- Kaguol ang gibati karon sa pamilya sa usa ka sundalo nga taga probinsya sa Cotabato nga napatay sa pagpamomba sa Jolo, Sulu niadtong Lunes.

Giila ang biktima nga si Private James Suriaga Apolinario, molupyo sa Barangay Magallion, M'lang, North Cotabato.

Si Apolinario bag-o lang sa serbisyo nga maoy gisaligan sa iyang pamilya.

Bag-o napatay si Apolinario, nakatawag pa siya sa iyang pamilya nga nag-ingon nga magpadala siya og kuwarta inig abot sa ilang suweldo.

Nag-ingon sab si Apolinario sa iyang ginikanan nga dili lang mabalaka gumikan "OK lang siya og kamu ang angay mag-amping batok sa coronavirus disease (Covid-19)."

Namatikdan sab nila nga murag subo ang sundalo nga nakig-istorya sa iyang pamilya sa M'lang.

Unom sa mga sakop sa 21st Infantry Battalion, Philippine Army nga kauban ni Apolinario ang napatay ug daghanan ang naangol.

Sa kasamtangan, muabot na sa 15 ang patay ug 81 ang naangol sa sunod-sunod nga pagpamomba sa Jolo, Sulu. (Edgar Fuerzas)