KIDAPAWAN CITY -- Gipahigayon sa siyudad sa Kidapawan sa probinsiya sa North Cotabato ang Grand Unity Walk ug Ride for Peace nga gipangunahan sa Police Regional Office 12 alas 6:00 sa buntag Marso 23.

Tumong sa regionwide one time, big time event sa nagkadaiyang dapit sa Rehiyon 12 ang “Ugnayan ng Simbahan at Pulis o USAP for Free, Credible and Peaceful Elections.”

Buot ipursige niini ang pagtinabangay sa nagkadaiyang sektor alang sa hapsay ug linaw nga piniliay sa Mayo.

Sumala kang PRO 12 Regional Director Chief Superintendent Elesio Tam Rasco, ang SALUBUNGAN: Grand Unity for Peace Dungan nga gipahigayon sa General Santos City, Cotabato City, Koronadal City, Tacurong City ug siyudad sa Kidapawan.

Sa Kidapawan City, nanguna si NCot Police Provincial Office director, SSupt. Maximo Layugan, NCot Governor Emmylou Mendoza, mga ahensiya sa gobyerno, religious groups, academe, transport groups, civic ug non-government organizations, NAMFREL lakip na ang mga kandidato.

Nakighiusa sab ang mga molupyo sa probinsiya sa kalihukan.

Ang aktibidad dunay kalabutan sa “Lakad Tungo sa Kapayapaan, Iwaksi ang Karahasan” nga nagkondena sa sunod-sunod nga pagpamomba sa nagkadaiyang dapit sa Mindanao. (Edgar E. Fuerzas)