DAVAO DEL SUR -- Giangkon sa Commission on Elections (Comelec) sa probinsiya nga gilangaw pa ang una ug ikatulong adlaw sa pagbalik sa voters' registration nga gisugdan niadtong Martes, Septyembre 1.

Sumala ni Abogada Jennifer Ancla, provincial election officer ning probinsya, nga wala pay nahitabong pagdagsa sa mga magparehistrong botante.

Nanaghap si Ancla nga anaa pa sa dughan sa mga botante ang kahadlok nga mogawas tungod sa coronavirus disease (Covid-19).

Apan giawhag niini ang publiko nga mosalmot sa maong aktibidad ilabi na ang mga unang higayon pang moboto.

Gikinahanglan lamang ang pagtuman sa mga protocol pinaagi sa pagsul-ob og face mask, face shield ug gamit og sanitizers aron malikayan ang patakboy sa kagaw.

Matud ni Ancla nga sa matag buhatan una sa Comelec ginahimo ang rehistrasyon sanglit wa pay pagtugot sa nasyonal nga buhatan nga maghimo sila og satellite registration.

Bisan sa lungsod sa Magsaysay sa maong probinsiya gilangaw sab ang rehistrasyon di susama sa mga miaging katuigan nga magpunsisok na ang mga botante.

Ang rehistrasyon pagpausab og datus ug transfer sa lugar sa pagboto mahitabo gikan alas 8 sa buntag hangtud alas 3 sa hapon diin motak-op sa Septyembre 30, 2021 isip pagpangandam sa piliay sa Mayo 2022. (Orlando B. Dinoy)