MOKABAT sa 600 drayber sa bus ug van, lakip na ang mga konduktor sa Davao City Overland Transport Terminal (DCOTT) ang gipaubos sa surprise drug test sa Philippine Drug Enforcement Agency (PDEA) Davao uban sa mga nagkalain-laing ahensya sa gobyerno alas 6:30 sa buntag, Martes, Marso 26, 2024.

Kini subay sa Oplan Biyaheng Ayos Semana Santa 2024 nga kampanya sa Land Transportation Office (LTO) Davao Region ug sa PDEA-Davao alang sa Holy Week.

Anaa sab ang koordinasyon sa lokal nga panggamhanan sa siyudad sa Davao diin ang mga nahisgutan mikooperar sa aktibidad.

Tumong sa Oplan Biyaheng Ayos Semana Santa 2024 nga masiguro ang kaluwasan sa mga pasahero human nga masuta ang resulta sa nasampit nga drug test.

Nasayran nga niadtong Marso 16, ang pangulo sa DCOTT nga si Aisa Usop miingon nga ang kaluwasan sa mga pasahero anaa sa kamot sa mga drayber, hinungdan nga gisiguro sa mga ahensya nga wala gyod nagbisyo og illegal nga drugas ang mga drayber.

Kon mapamatud-an pinaagi sa confirmatory test nga positibo ang resulta sa usa ka drayber o konduktor, dili kini tugotan nga mobiyahe ug ipatuman ang proseso pinaagi sa ilang mga kompanya.

Sukad sa pagsuwat ning balita, wala pa gikabutyag kon dunay nagpositibo sa gipahigayon nga drug test.

Hinuon mipasalig ang DCOTT sa kaluwasan sa mga pasahero sanglit pipila pa lang ka semana una ang Holy Week, ilaha nang gipahibalo ang mga kompanya sa bus niini mahitungod sa maong drug test.

Ang DCOTT maoy usa sa dako nga terminal sa siyudad sa Davao alang sa mga bus nga magbiyahe-an padung sa amihanan ug habagatang bahin sa Mindanao. (JPC, Niel Otacan, DNSC Intern)