UNOM ka tims nga langkuban sa mga babayeng miyembro ang magsangka sa duwang football atol sa 16th Acosta Cup nga sugdan karon, Oktubre 27, 2019 sa University of the Philippines (UP) Mindanao-Davao City Sports Complex sa Mintal, Davao City.

Gibutyag ni 1st District Councilor Mabel Sunga Acosta nga duha ang venue asa himuon ang duwa, una sa UP Mindanao ug sa Tionko Football Field sa Ecoland, dakbayan sa Davao.

Si Acosta mipahayag nga open ang torneyo aron mahatagan og kahigayunan ang mga kabataan gikan 11-anyos nga makig-uban sa mga hamtong ug duna nay kasinatian sa pagdula aron sab sila mas mahanas pa.

Pipila sa mga bata nga misugod sa Acosta Cup ang nakaapil na sa internasyunal nga kompetisyon ug ang uban naa na sa National Team.

Sa pagdula sa UP Mindanao Football field ila sab masinati ang pagdula sa usa ka international standard nga field tungod nindot og international standard kini.

Una sab kini nga higayon nga ilang gipalapdan ang area sa mga mosalmot ug miaapil ang tim sa Nabunturan, Compostela Valley Province.

Sa pagsugod sa torneyo, makigsangka ang Sikat Alab FC, depending champion kontra CR7 Food Truck samtang ang ikaduwa nga dula mahitabo tali RMC Solido batok UP Mindanao footbal team.

Ang torneyo molungtad sa 17 ka adlaw, upat ang gitakda sa UP Mindanao ug unom ang sa Tiongko Football Field apil na ang kampeyonato nga himuon sa Disyembre 8, 2019.

Mga tropeyo ug medalya giandam alang sa mga modaug uban sa mga pahalipay gikan sa mga isponsor sa dula.

Sa laing bahin, ipahigayon sab ang ikaduhang Women in Action Photo contest sa maong torneyo.

Dunay giandam mga mga ganti alang sa mga modaug. Dunay duha ka kategoriya ang maong photo contest alang sa mga amateur ug professional photographers.

Sa mga amateur pwede mogamit og cellphones. Kinahanglan magparegister ang mga moapil pinaagi sa Acosta Cup Facebook apan mopirma gihapon sa waiver didto sa opisina ni Konsehal Acosta. (Seth delos Reyes)