OROQUIETA CITY, Misamis Occidental - Si Andrea Annabela De Guia sa Toril, Davao City nabulsa ang iyang ikatulong bulawang medalya sa Batang Pinoy Mindanao Leg athletics competition sa Misamis Occidental Provincial Athletics Center (Mopac).

Ang 15-anyos nga estudyante sa Doña Carmen Denia National High School, mirehistro og usa ka minuto ug duha ka segundos aron modaug sa girls 13-15 400-meter dash human midomina sa girls 3,000m ug 1,500m.

Gipildi niya sila Sweet Joy Pantaleon (1:06) sa Koronadal City ug Mel Joy Gonzales sa Sto. Tomas, Davao del Norte (1:07) kinsa nakaplata ug bronze sa maong han-ay.

Alang kaniya, sa pagdaug og tulo ka bulawan di pa sakto sa Dabawenya.

"Gusto nako five golds, kay ang 2 sa relay, gusto man gud nako mag gold sab akong mga kauban," pahayag niya atol sa pakighinabi sa Sun.Star Davao.

Nagpasalamat si De Guia sa iyang inahan, kinsa nagpadako sa iya nga nag-inusara ug padayon sa pagsuporta sa iyang isports.

Wala sab niya gikalimtan sa pagpasalamat ang iyang coach ug trainer, teammates ug ang lokal nga gobyerno sa Davao sa pagpadala niya sa torneyo ug paghatag og pagkaon, uniporma ug transportasyon. (MLSA)