ANG trackster nga si Andrea de Guia migilak og maayo alang Unit 3 secondary girls team, human miharos og tulo individual golds ug duha ka relay gold medals sa Davao City Athletic Association (Dcaa) Meet 2018 athletics competition nga natapos sa Davao City National High School (DCNHS) grounds, Biyernes.

Ang taga-Toril mitabang sab sa team niyang maangkon ang kadaugan sa secondary girls 4X100 ug 4X400 golds.

Midaug sab siya og lima ka bulawan sa edisyon sa Dcaa Meet sa nakalabay nga tuig.

“Nakuha nako ang five golds kay naningkamot ko na madaog among team din nag training pud ko og maayo,” sa pakighinabi kaniya sa SunStar Davao via Facebook.

Labaw siyang nadasig uban ang iyang coach, chaperone, trainers, teammate’s ug inahan.

Dugang sa Doña Carmen Denia National High School Grade 11 student nga karon nangandam na sab siya sa Davraa Meet 2019 diin host na sab ang dakbayan.

“Excited nako mag-training. Focus lang ko sa training.”

Ang Department of Education Davao City mopaguwa pa og resulta labot overall medal tally.