SI BEA Burbe, kinsa misilhig og tulo ka bulawang medalya alang sa Davao City sa bag-ohay pa lang nga nahuman nga tigi Batang Pinoy 2019 Mindanao Qualifying Leg athletics sa Davao del Norte Sports and Tourism Complex sa Tagum City, pahimuslan ang walo ka bulan nga nahabilin sa pagbansay una siya makigtakus sa national championship sa Oktubre.

Siya, kinsa lumad nga taga Calinan, gidayeg nga Batang Pinoy 2019 Mindanao sprint princess human naguna sa girls 13-15 100-meter ug 200m dash events.

Nangulo sab siya girls 4X400m relay team aron angkunon ang bulawan.

“First time nako moapil sa Batang Pinoy. Wala ko mag-expect modaug kay nakulbaan ko sa akong mga kalaban,” tug-an ni Burbe, 14, sa paghinabi uban sa SunStar Davao.

Si Coach Valerio Bulpa, sa iyang bahin, nagsulti nga si Burbe dunay dakong potensiyal nga modaug sa Batang Pinoy nationals. Gisulti niya nga ang trainer nga si Ramil Torregosa Bansag-ao magmonitor sa pagbansay ni Burbe.

“Wala lang sya maka-gold sa Davraa kay halos 17 na mga nakalumba niya,” matud ni bahin Bulpa nga dugang nagkanayon nga si Burbe nakaangkon lang og platang medalya sa secondary girls 200m ug nitabang sa pagpuga og bulawan sa relay alang sa siyudad.

Apan si Burbe napakyas sa pagkuwalipikar sa taliabot nga Palarong Pambansa 2019 gitakda sa Abril 27 hangtud Mayo 4 sa Davao City.

Hinungdan, iyang konsentrasyon mao ang Batang Pinoy national finals nga posibleng himuon sa Tagbilaran City o Ormoc City.

Ang Grade 8 nga tinun-an sa Calinan National High School nipasalig, “Maningkamot lang jud ko.”