SA WALA damha, kalit nga miluwat sa iyang katungdanan si basketball legend Magic Johnson isip president of basketball operations sa Los Angeles Lakers sa rason nga tinguha niyang mobalik sa mas yanong kinabuhi isip usa ka negosyante.

Wala sultihi ni Johnson ang tag-iya sa Lakers nga si Jeanie Buss hasta ang general manager nga si Rob Pelinka kabahin sa iyang plano.

Iya lang kining gibutyag sa wala pa magsugod ang katapusang duwa sa host Lakers sa National Basketball Association (NBA) 2018-19 season diin nasugamak ang team sa 104-101 nga kapildihan batok sa Portland Trail Blazers.

“I want to go back to having fun. I want to go back to being who I was before taking on this job. We’re halfway there with LeBron coming (last summer). I think this summer, with that other star coming in, whoever is going to bring him in,” matod ni Johnson.

“I think this team is really going to be in position to contend for a championship with the growth of the young players.”

Bisan sa paghiabot ni four-time MVP LeBron James, ang Lakers pakyas gihapon pagsulod sa playoffs ug nanamilit nga bawon ang 37-45 nga rekord.