IMPRESIBONG kadaugan maoy gilihi sa mga kanhi Ala Boys ngadto sa ilang bag-ong boxing stable atol sa boxing promotion nga giulohan og "Vengeance" nga gipahigayon sa SanMan Boxing Gym sa General Santos City Huwebes, Disyembre 17, 2020.

Ubos na karon sa Sanman Promotion ni Jim Claude Manangquil, tagsatagsang gipang knockout nila ni Kevin Cataraja, Jeo Santisima, Melvin Jerusalem ug Esneth Dominggo ang ilang mga kaatbang sulod lang first ug second round sa maong promotion nga maoy ikaduhang professional boxing presentation sa nasod taliwala ning nagpadayon nga pandemya.

Sa main event, si Cataraja (12-0, 9 KOs) nagkinahanglan lang og usa ka round aron idespitsar ang beteranong si John Mark Apolinario (20-14-3) samtang gipaundang usab ni Jeo Santisima si Marjon Piencenaves sa second round.

Kaduha gyud tumbaha ni Santisima si Piencenaves kinsa nagtinguha pa unta kini nga mosukol pa apan ang second/trainer na niini maoy miwarawara sa iyang kamot, timaan sa pagsurender.

Wala usab magdugay ang kontra ni Jerusalem nga si Jayson Francisco kinsa iyang gipayaka sa uwahing bahin sa ikaduhang round, butang nga mao usab ang gihimo ni Esneth Dominggo ngaadto ni Gerald Alvarez kinsa wa makaantos sa nag-aso-aso nga mga kinumo sa kanhi world title challenger.

Hingpit nga giharos sa mga fighters sa Sanman Promotions ang tanang away sa maong presentation human mikulit usab og unanimous decision si Regie Mananquil batok ni Rio Gulipatan.

Kadto maoy unang away nila ni Cataraja, Santisima, Jerusalem ug Dominggo ubos sa ilang bag-ong manager nga si JC Manangquil, ang chief executive officer sa Sanman Promotions, human manira ang Ala Boxing gym niadtong bulan sa Agusto tungod sa coronavirus disease. (JBM)