SI GABRIEL Velasco, 2018 Datba bowler of the year, nihari na sab sa Datba weekly qualifying tournament nga nahitabo sa SM Lanang Premier Bowling Center sa tapos sa semana.

Ang 23-anyos nga si Velasco, graduwadong tinun-an sa nursing sa Davao Doctors College, nipatumba og 664 pinfalls human ang tulo ka duwa nga duna lay siyam ka kakulangan.

Ang iyang kalampusan naghatag kaniya og higayon og puwesto alang sa monthly finals.

Si Celso Garcia, nga dunay 15 kakulangan, nahiluna alang sa runner-up pinaagi sa 628 pinfalls samtang ang ikatulong puwesto mao si Dario Beloy, kansang kakuwangan niabot og 28, nipaligid og 624 pins.

Ang unang tulo ka nakahiluna nakadawat og P1,000, P500 ug P300.

Si Ivan Awid (619) ug Ronald Martin (608) nitapos sa ikaupat ug ikalima sa maong han-ay, sa torneyo nga gipasiugdahan sa Davao Tenpin Bowlers Association (Datba) isip qualifying alang sa monthly finals nga naghanyag og mas dako nga ganting salapi uban sa tropeyo.

Kinatibuk-ang 19 ka magduduwa nakigtakus sa bag-ohay lang nga torneyo sa bowling. (MLSA)