MAGIC is an art!

Ingon niini ang paghulagway sa grupo sa mga magikero dinhi sa Mindanao.

Ug aron mas mapalig-on pa ang ilang grupo, namugna ang Mindanao Brotherhood of Magicians (MBM) sa pagpanguna nila Gino Alonzo Janducayan, James Infiesto ug Peter Miral.

Ang tulo nagkumboya sa pagmugna sa grupo nga mohangop sa tanang magicians sa Mindanao, di lamang kadtong may abilidad na daan, apan apil sab kadtong adunay hilig o gihulagway nilang "enthusiast."

"It's time na rin na we organize para mas ma-professionalize ang trabaho as magicians," suma ni Infiesto nga aktibo sab sa pipila ka chess events ug competitions dinhi sa siyudad.

Dugang sab ni Janducayan nga nakita nilang gikinahanglan na nga maghugpong ang grupo alang sa mas ikaayo ug ikalambo sa ilang abilidad.

"Ang group will organize different activities like seminars, workshops para sa mga interesado to learn magic. Part na sa among goals and mission as we organize the group," segunda ni Janducayan nga mipasikat sab kaniadto sa Pilipinas Got Talent.

Sa nakalabay nga Enero 17, ning tuig gihimo ang unang General Assembly ug Induction of Officers sa Mindanao Brotherhood of Magicians sa McDonalds Bolton.

Mga mihural nga opisyales gilangkuban nila Jecris Gica (Presidente); Mark Frances Pascua (Bise Presidente); Melchor Hernan Jr. (Secretary); ug Rurichill Visaya (Auditor); samtang mga coordinators mao sila Robert Manlitoc, Israel Ecleonel ug Rurichill Visaya.

Mga miyembro sa grupo gikan pa sa kasikbit siyudad sa Davao City.

Malaumon silang mas molapad pa ang ilang panag-uban, ug mas malig-on ang ilang mga programa alang sa mga kaubanang may dakong pasyon sa mahika.