PIPILA ka adlaw nalang, motakdo ang sakto napulo ka tuig sa gikonsiderang pinakaduguon ug pinaka-ngilngig nga nahitabo sa kinabuhi sa mga tigbalita nganha sa election-related violence sa kasaysayan sa Pilipinas ug sa tibuok kalibutan.

Kini mao ang Maguindanao Massacre nga nahitabo niadtong Nobyembre 23, 2009 diin 58 ka mga tawo ang dungan nga gipatay -- 32 niini pulos sakop sa media ug ang 26 diha'y mga drayber sa van nga ilang gisakyan ug ang kabanay ni Governor Esmael "Toto" Mangudadatu.

Hangtud karon, daw kagahapon lamang ug lab-as pa sa panumdoman sa mga nahibiling pamilya ang maong ngilngig nga hitabo sa ilang mga kabanay.

Lab-as sab ug puno sa pakigbisog ang pagtaral sa kaso sa mga pamilya batok sa iladong banay sa Maguindanao kinsa maoy gitudlong mga nag-unang suspek ang pamilyang Ampatuan.

Niadtong Hulyo 17, 2019 nahuman ang pagtaral sa kaso didto sa Quezon City Regional Trial Court Branch 221 ug gihulat nalang ang "verdict" kun final nga hukom sa korte labot sa kaso.

Naglaum karon ang mga kabanay sa mga biktima nga unta mogula na ang hukom una ang ika 10th Anniversary sa maong hitabo, aron sa ingon mahupay-hupayan ang kasakit ug mabati ang espiritu sa hustisya.

Dunay panaghap karon ang pipila, ug naglaum nga dili unta kini masagulan og mantsa sa suhol, apan dako sab ang paglaum sa katawhan nga ligdong ug tinuod kining nagdala karon sa renda sa panggamhanan, labi na sa Korte Suprema, dili masuholan, ug mapagawas gayod ang tinuod nga resulta ug mopatigbabaw ang hustisya.