BISAN og walay diretsa nga bahad sa terorismo ang Davao Region mas gidoble pa niini ang seguridad labi na sa himuong 'Ligtas Summer Vacation (Sumvac) 2019'.

Gipanganti sa kapulisan sa Davao Region nga mas mapatuman pa ang hugot nga seguridad labi na karong Holy Week ug padung ngadto sa hinapos sa summer, karong Mayo.

Si Police Regional Office (PRO)-Davao Region director Police Brigadier General Marcelo C. Morales nagpahimangno sa katawhan nga kinahanglan mosunod sa mga regulasyon nga ipatuman sa mga nagkadaiyang mga dapit nga dugukunon og tawo.

"Such events are expected to generate numerous commuters and tourists who will travel to their respective provinces and tourist destinations and these may cause peace and order concerns including traffic congestion, accidents and other crimes," pahayag ni Morales.

Gipasalig sa opisyal nga anaa gayod ang kapulisan diha sa pag-foot/mobile patrols, pagbutang og Police Assistance Desks/Centers (PADs/Cs) ug deployment sa Road Safety Marshalls sa mga convergence points partikular sa Francisco Bangoy International Airport, Davao City Overland Transport Terminal (DCOTT), pantalan sa Sasa, ug uban pa nga recreational areas sama sa highways, mga nag-unang agianan ug crime prone areas.

“As of now, there have been no validated reports of terrorist threats in Davao City while security forces and the intelligence network are continuously monitoring and doing their jobs,” niya pa.

Di na kini ikalilong pa nga kugihan gayod ang kapulisan ingon man ang kasundalohan ug ang Task Force Davao.

Kugihan, sa butang nga ang ilang tumong mao ang pagpabilin nga luwas nga mangatulog sa kabalayan ang katawhan sa Davao City ug sa mga kasikbit nga dapit ning rehiyon.

Mokooperar lamang ang katawhan sa mga regulasyon ug kinahanglan anaa kanunay ang pag-ampo sa Kahitas-an aron mas mapatunhay pa ang kalinaw.