SAMOT karon nga naguol ang mga miyembro sa Kapa Community Ministry International Inc., human gibasura sa Regional Trial Court (RTC) Branch 35 sa General Santos City ang ilang gipasaka nga injunction case aron makapadayon unta sila sa pag-operate.

Mipabor ang hukmanan ngadto sa Securities and Exchange Commission (SEC) diin na-dismiss ang petisyon nga gi-file niadtong Abril 4, labot sa pagpaguwa sa komisyon og cease and desist order (CDO) kontra Kapa tungod sa di otorisado nilang pagbaligya ug pagtanyag og securities.

“Accordingly, the motion is hereby denied and this case is hereby ordered dismissed,” suma ni Presiding Judge Oscar P. Noel, Jr.

Pinaagi sa CDO nga gipahamtang sa Kapa, sila gidid-an nga makapamaligya ug makatanyag og securities sa publiko kay wa silay saktong dokumento.

Ang regional trial court sa General Santos City miisyu og writ of preliminary injunction kontra SEC, Abril 10.

Apan gibarugan sa SEC nga walay hurisdiksiyon ang korte sa maong isyu.

Gumikan niini, daghan kaayo ang naguol ug nakasinati sa pagkahugmak sa ilang mga maayong plano sa unahan.

Ang nahitabo, nahimong leksyon sa tanan labot mga money investment schemes.

Kay wala nama’y mahimo ang mga investors, modawat nalang sa kamatuoran, diin ang nahitabo ibutang nalang nga usa ka leksyon.

Lekyson nga magsugo kanato aron madesiplina ang batasan ug pagtuo nga kinahanglan dili na magpa-ilad.

I-ampo nalang ang tanan aron mahupay ra sa dughan ang naagian nga kapakyasan sa susama niini nga money investment.