MAKALILISANG ang mga balita sa Bagyong Ompong gumikan gikonsidera kining Super typhoon ug category 5 Atlatic hurricane sa laing nasud.

Sa layo pa ang maong daut nga kahimtang sa panahon sa Philippine Area of Responsibility (PAR), daghan na kaayo og mga remedyo sa pagluwas sa kaugalingon ang gihimo sa gobyerno aron di masubli ang kaagi sa Bagyong Yolanda ug Bagyo Pablo nga mikutlo og daghang kinabuhi.

Bisan og dunay gikatahong mokabat 20 ka tawo ang namatay sa Bagyong Ompong ug minilyon ang kantidad sa nadaut nga pananom ug istraktura, daw moarang-arang kini itandi sa Yolanda ug Pablo.

Nag-unang rason nga nakubsan karon ang damyos ug ang ihap sa nakutlo nga kinabuhi mao ang pagkamaandamon ug pagsunod sa pahimangno sa otoridad nga mamakwit.

Nahimong leksyon sa kadaghanan mao ang nahitabo sa Yolanda ug Pablo nga kung buot subayon, daw nagkulang gayod ang gobyerno sa maong mga katuigan.

Apan lahi kining administrasyon karon, gumikan giuna gayod niini ang kahimtang sa katawhan, kay nasayod kining gobyernoha nga kung pasagdan lamang ang katawhan nga mopabilin sa ilang mga dapit, lagmit gobyerno gihapon ang manubag human sa epekto sa bagyo.

Hinaut nga di gayod magmagahi ang katawhan sa pagbakwit kung duna nay pahimangno ang otoridad.

Di angay mawili sa mga kabtangan, kahayupan ug pananom kay kining tanan makita pa, apan ang lisod dawaton mao ang pagkawala sa kinabuhi sa tawo nga di na gayod puwedeng mabalik.