SAMTANG nagkatigulang na ang kalibutan, daghan na ang mga relihiyon ang nanungha, usahay abuton kana sa kalibog kung hain ang relihiyon nga iya sa Diyos ug anaa ang kaluwasan.

Aduna ko’y suod nga amigo nga katulo na magbalhin-balhin og relihiyon pero, wala pa gyud siya makontento, kutob sa mga Pastor ug mga Ministro nga magpakita nga maayo kaayo mutoki sa mga pulong sa Diyos gikan sa bibliya, nakahunahuna na pod siya nga mobalhin.

Pero akong giingnan, "brad, basig mabuang ka, ayaw pagpunay og hangad sa usa ka tawo nga maayo kaayong mopahiluna sa mga pulong gikan sa bibliya, kay sa ngadto ngadto, himuon mo na siyang kulto, kon Diyos-Diyos."

Kun duna kay bibliya, batasana ang pagbasa ug human sa imong pagbasa, sabta kun unsay buot ipasabot para sa imong kaugalingong kaluwasan; kay dili ang relihiyon ang makaluwas nimo kon dili ang pagsubay nimo sa kabubot-on sa Diyos, karatula lang nang pangalan sa relihiyon para dili bugos rehistrado sa ahensiya sa atong gobyerno.

Wala kaba’y namatikdan? Kadaghan sa mga nagtukod og relihiyon, nangadatu ginamit ang mga miyembro, di pa gyud kontento, ila pang isangyaw ang ilang gitukod nga relihiyon didto sa America tungod kay dolyar ang ilang kita-on, ang gihimong kapital mao ang atong Diyos, kay libre man sa buhis basta relihiyon.

Duna po'y uban, magpa-pastor pero walay simbahan nga gidala, mangayo og donasyon ngadto sa mga pobre para daw padatuon, ang resulta siya ang nadatu, ang pobre nagpabiling pobre.

Lain-lain ang pagsabot kon interpretasyon sa bibliya ning kalibutana ang hisgutan, mao nga daghang mga relihiyon nga nanungha, pero depende nimo kun magpatintal ka.

Dili porke nakatapos sila sa pagtuon sa bibliya, pilisopiya, bible college, adto nata maghangad sa ila kun unsay interpretasyon nga buot tang sundon. Tungod kay kadaghan kanila ang bottom line, kwarta... kwarta... kwarta, di ba?

Mao bitaw nga kadaghanan sa mga Pastor ug Ministro, pulos mga milyonaryo, walay pobre.

Ang balaud lang sa atong gobyerno ang adunay usa lang ka legal nga interpretasyon, kini mao ang Supreme Court, bisag bright ka pa nga abogado dili basta basta dawaton ang imong kaugalingong opinyon nga gituhuan nimo nga husto ka, kun dili, ang hiniusang opinyon lang sa Korte Suprema ang ilhong legal nga pagsabot o interpretasyon.

Sa bibliya bisag kinsay mobasa, ug magmugna og iyang kaugalingong pagsabot, pwede kanang magtukod og relihiyon, ug kung adunay motuo nimo, siguradong madatu ka, hangtud nga mahimo kanang milyonaryo, ug dinhi magpatuo-tuo kana nga ikaw mao si Hesukristo bisag wala sa balaang kasulatan, kini tungod kay nahubog kana sa bahandihanong kalibutanon.