“Mao kini gayud ang tinuod natong kalan-on, mga higala.”

NAKAPAHIYOM ko pagdungog sa panag-istorya sa maghigala dapit sa cosmetics section sa usa ka mall.

“Mare, mao kini ang akong ginagamit aron nagpabilin nga hamis ang akong nawong,” ingon sa usa, nga nagtudlo sa natungdang facial cream.

“Mao ba, mare? Naa ba'y para liog ana, mare? Kay lain man tingali tan-awon nga hamis tuod akong nawong, pero akong liog, kunuton ug itom lang gihapon.”

Kalit ko nga nihawa aron libre ko nga makatawa. Ang duha ka mga senyor, intawon, naningkamot nga bata lang gihapon tan-awon.

Hinuon, aduna ko'y nahigala sa una nga ang edad niya singkuwenta na, pero kung tan-awon, mora la'g traynta. Naga-practice daw siya og vegetarianism, tungod sa iyang background sa Buddhism.

Ug kung sayron nato ang Bibliya, sa Genesis pa lang, kini nasulat na. Nagkanayon sa Genesis 1: 29, “Ug miingon ang Diyos, 'Tan-awa, gihatagan ko kamo sa tanan nga balili nga nagahatag og binhi, nga anaa sa ibabaw sa nawong sa tibuok nga yuta, ug sa tanan nga kahoy nga may bunga sa kahoy nga nagahatag og binhi, aron alang kaninyo kini mahimong kalan-on.'”

Mao kini gayud ang tinuod natong kalan-on, mga higala. Tungod niini, tan-awa ang mga patriarka nga nagsubay gayud sa prinsipyo sa Bibliya - si Adan nag-edad og 930 ka tuig, Seth 912 ka tuig, Methuselah 969 ka tuig ug Lamech 777 ka tuig.

Kung atong huna-hunaon, unsay panagway niining mga patriarka? Ako nakaseguro nga bisan pa og 500 ka tuig na sila, ang panagway ug barog, mga batan-on pa.

Genesis 5: 32 nagkanayon, “Ug ang panuigon ni Noe lima ka gatus ka tuig, ug nanganak siya kang Sem, Ham ug Japhet.”

Tan-awa ra, ayha pa naminyo si Noe sa iyang ika-500 ka tuig! Lima ka gatus (500) na siya, batan-on pa; apan kita, singkuwenta (50) pa lang, tigulang na. Pagkapait ikompara!

Dakung butang ang atong ginakaon alang sa atong panagway ug panglawas, mga higala. Dili cosmetics ang pinaka-epektibong solusyon sa atong pagpabiling batan-on. Importante gayud kung unsa ang atong ginakaon.

Kung atong sundon ang ginarekomenda sa Bibliya; magprutas-prutas kita, mag-gulay-gulay lang ta, pagkaon sa karne hinay-hinayon na, nagkaigong pag-inom sa tubig makapabiling batan-on sa panagway ta.

Busa, sundon gayud nato ang Bibliya. Kay ang nagdisenyo sa atong lawas mao gayud ang Diyos, ug nasayud gayud Siya kung unsay tama nga atong dapat kaunon.

Busa, ayaw kalimti ang Genesis 1: 29. Prutas, gulay, mga binhi, mao kini atong ihan-ay sa atong mga lamesa kanunay. Aron pagpabiling hamis ang atong mga aping, liksi ang atong mga lawas, ug dili mabuslot ang atong mga bulsa sa sige og palit sa mga cosmetics nga walay kuwenta.

Kay kung wala na kay kuwarta, paggamit sa cosmetics mag-undang na ka, pagkun-ot sa imong nawong, magdoble intawon.

Busa, mga higala, basaha ug sunda ang Bibliya. Aron sa edad ug pagkabatan-on, magdugay ka pa.