SAMA sa mga niaging away ni Senador Manny “Pacman” Pacquiao, mora'g Biyernes Santo niadtong Dominggo. Nakigharong si Pacman, ang gitawag nga “Pambansang Kamao” sa batan-ong Argentinian Welterweight Champion Lucas Matthysse nga iyang napatumba sa makatulo ka higayon didto sa Kuala Lumpur, Malaysia.

Nidaug si Pacman dala ang nasaknit niini nga bakus sa maong division nga gisaksikan ni Presidente Rody Duterte mismo ug Malaysian Prime Minister Mahathir Mohamad.

Sa iyang pagdaug sa lain pang higayon, nitumaw ang daghang pangutana kung unsay padulngan sa iyang karera sa boksing ug sa politika. Kung si PRody pa ang pasultihon, gusto niyang makita nga mopahulay na sa pagboksing ang iyang higala nga taga General Santos. Dako na daw nga dungog nga iyang gidala sa nasud busa panahon na nga mapahimuslan ang iyang kadaugan samtang lig-on pa.

Kung ang mga boxing analysts ang pasultihon, kaya pa ni Pacman nga moharong og lain pang duha ka Championship Bouts una siya permanenteng moretiro.

Sa laing bahin, ang mga mahiligon sa boksing gusto pang makita si Pacman sa upat o lima pa ka tuig. Nakita daw nila ang Pacman nga niharong niadtong 2009 batok nila ni Cotto ug Dela Hoya busa may ikabuga pa kini sa mga tuig nga moabot.

Lahi sab daw ang taktika ni Coach Boboy Fernandez kaysa ni Freddie Roach nga posibleng mopadugay pa ni Pacman sa boksing.

Apan ang mga politiko gusto nang mohunong si Pacman sa pagboksing ug motutok sa politika ug di ba kaha sa iyang mga negusyo ug isip promoter sa boksing sama nila ni Golden Boy De La Hoya ug uban pa.

Si PRody mismo nipadayag na nga puwedeng mahimong Presidente si Pacman kung gustohon niya. Kung wa ko masayop, sa usa ka birthday party ni Pacman gipadayag sa pangulo ang katakus ni Pacman nga modala sa renda sa panggamhanan sa nasud.

Kung mapasar ang bag-ong batakang balaod ug madayon ang sistemang Pederal posible kaha nga si Pacman ang usa sa mga piliang mahimong pangulo?

Madayon kaha ang panagna ni Mother D nga mahimong presidente ang iyang anak?

Naimbiyerna man god kaniadto si Mother sa daghang batikos nga iyang nadunggan batok sa iyang anak nga kulang kuno sa edukasyon ug nag-trying hard nga mahimong politiko.

Apan nadayon gayud nga napili siyang senador sa nasud nga bisan sa iyang kadaghan og absent, naningkamot nga makigsabayan sa mga tang-an nga senador ug hataas nga opisyal sa gobyerno.

Karon nga nidaug siya batok kang Matthysse, mas modako pa ang iyang puruhan nga matuman kining gidamgo sa iyang mga supporters. Sama kang PRody, lahi nga klase si Pacman nga gipangita sa katawhan.

Para kanako dili babag kang Pacman ang iyang kakulang sa edukasyon aron maoy mangulo sa nasud. Di pod babag ang iyang kasingkasing ngadto sa kabus nga Pilipino nga iyang serbisyohan kung pangulo na siya.

Wa poy problema sa sapi tungod kay ikaduha siya sa pinakaadunahan nga senador sa nasud ug kung magpadayon ang iyang karera sa boksing, hayan binilyon pa ang iyang kitaon. Apan sa pagkapangulo sa bag-ong gobyerno, seguradong magkamamo siya!