USA ka mananagat ang nahiagum og samad tinigbasan sa likod sa iyang lawas human gikabikil ang usa ka empleyado sa 711 Fishcage mga alas 10 sa kagabhion niadtong Pebrero 14, adlaw sa mga Kasing-kasing.

Ang biktima giila ni PO1 Jesus Perater nga si Richard Minina, 20, ulitawo, ug taga Sitio Sulok, Barangay Tanglad, lungsod sa Sta. Maria, Davao del Sur.

Si Minina kalit lang nga gitigbas sa 30 anyos nga si Danny Lamoste, minyo ug molupyo ra sab sa lugar, matod ni Perater.

Sumala sa blotter sa Sta. Maria police, wa nagkasinabot ang biktima ug suspek niadtong higayona kinsa gihulagway nga pulos naka-inom.

Nagping-it sa kasakit sa samad tinigbasan ang biktima samtang giatiman sa mga doktor sud sa usa ka tambalanan sa lalawigan.

Matod sa kapulisan, nigamit og sundang ang suspek ug ang armas anaa na sa ilang kustodiya alang sa dugang imbestigasyon.

Sa pagsuwat ning balita, kagahapon sa buntag giduso na sab sa mga otoridad ang kaso ngadto sa buhatan sa piskalya. (Dondon Dinoy)