NAGSUGOD nag pangabot sa Sugbo sugod kagahapon ang mga official ballot nga gikan sa ulohang buhatan sa Commission on Elections (Comelec) nga gamiton sa labing unang poll automation unya sa Mayo 10.
Gipaubos sa higpit nga seguridad ug pagbantay sa tanang mga nalambigit sa eleksyon dihang niabot ang mga balota mga pasado alas 9 sa buntag kagahapon.
Ang naasoyng mga balota alang sa San Fernando ug Sibonga nga pulos mga sakop sa unang distrito sa lalawigan sa Sugbo.
Human kini niabot, gihatod gilayon sa mga representante sa Comelec ngadto sa tagsa-tagsa ka mga lungsod ug gidawat sa mga municipal treasurer sa San Fernando ug Sibonga.
Nangabot usab ang ubang mga balota human sa paniudto kagahapon nga alang sa ubang dakbayan ug kalungsuran sa lalawigan sa Sugbo.
Gawas sa San Fernando ug Sibonga, gikatakda nga mangabot usab kagahapon ang alang sa Compostela, Liloan, Carmen, Catmon, Sogod, Borbon ug dakbayan sa Danao.
Kining pagpangabot sa mga balota gikatakda nga mahuman unya sa Mayo 3.
Sa samang kalambuan, gipahigayon kagahapon sa Comelec ang transmission testing. (JECT)