DEAR Noy Kulas,

Usa ko ka inahan, 19. Ang akong anak unom na ka buwan. Pero sukad-sukad wala gyud nakahatag ang amahan og sustento para sa bata. Makagaukod ba ko og sustento para sa bata nga wala man mi makasal ug wala pud siya makapirma sa live-birth sa bata? Naa man siyay trabaho. Regular napud siya. Pero nagdumili man siya sa paghatag. Unsa may maayo nakong buhaton?

JEN

Jen,

Nagkinahanglan ka og abogado kon gusto kang mogukod sa amahan sa bata. Kon wa kay kwarta, suwayi ang Public Attorney’s Office (PAO) kay basin matabangan ka. Kon di gani, suwayi ang Children’s Legal Bureau kay basin ila kang matabangan nga makakuhag sustento pinaagi sa ubang mga pamaagi.

Nakalisod sa imong situation kay ang lalaki nga amahan nianang imong gisabak nag DNA (di na ako) mode. Kana bang klase sa lalaki nga di kahibawo manubag sa kaakuhan kay ang giapas ang pagkababaye lang. Kay wa siya manubag bisan sa pag-ila na lang sa bata, wa siyay interest sa pagsuporta ug bisan sa pag-ila na lang niini. So, lisod ang pagpugos kay wa kay legal nga ebidensya nga magpakita nga siya ang amahan. Maayo unta to kon iyang giila.

Sa DNA testing, medyo mahal man na. Kon ikaw ang mohimo, mogasto kag kuwarta. Di ko sure kon pila ang bayad. Wa sab ko kahibawo kon available nab a sa Cebu ni kay sa akong nahibaw-an sa Manila ra ni.

Pakigkitai ang mga buhatan nga akong gisulti nimo aron guided ka.

NOY KULAS

rAlang sa imong problema, e-mail lang sa: kulassuper@sunstar.com.ph. Suwat sab sa: Tambagi Ko, Noy Kulas, Sun.Star bldg., P. del Rosario st., Cebu city