NAGKATIBULAAG ang katawhan dihang adunay pinusilay nga nahitabo sa usa ka ukay-ukayan kagahapon sa udto sa Daumar St., Cogon ning dakbayan sa Cagayan de Oro.

Tulo ang patay sa pinusilay kinsa usa pa lamang ang adunay identipikasyon nga mao si Mawi Soliman, usa ka trabahante sa ukay-ukayan sa dapit.

Ang laing duha ka biktima sa pagpamusil pabiling wala pay identipikasyon sa pagsulat ning balita kinsa maoy gidudahan sa kapolisan nga mipusil patay kang Soliman.

Anaa pa ang duha sakay sa ilang motorsiklo nga naligid dihang napusilan.

"Mao gyod na among giimbestigahan karon kung kinsa sab ang nagpusil anang nagmotorsiklo," matud ni Senior Police Officer 3 Marvin Bolanio, imbestigador sa Police Station 2 sa Cogon sa interbyu sa SunStar SuperBalita.

Nasayran nga samtang kamulo og bantay sa ukay-ukayan si Soliman kalit lang kining gipusil sa duha ka mga lalaki nga sakay sa motorsiklo ug dihang paingon na mosibat ang nakamotorsiklo kalit lang adunay namusil kanila hinungdan sa ilang kamatayon.

Ang kapolisan padayon pa sa pag-imbestigar kon unsay motibo sa pagpamusil labina usa sa nahisgotang rason mao ang giingong rido.