GIKATAKDANG mahatagan na og puloy-anan ang mga biktima sa bagyong Sendong human modonar ang nasod sa Japan pinaagi sa Deaprtment Social Welfare and Development (DSWD) Northern Mindanao.

Kini ang gikumpirma ni Virgina Cardona sa Crisis Intervention Unit sa DSWD Northern Mindanao ug miingon nga kung mahidangat na ning bulan sa Agusto ang budget nga idonar sa nasod sa Japan gikatakdang tukoron ang panimalay sa maong bulan.

Gipasabot ni Cardona nga moabot sa 722 ka mga panimalay ang tukoron diin ang motrabaho niini ang mga biktima lang gihapon sa bagyong sendong diin sila makadawat gihapon og sweldo.

Gibutyag niini nga sa kasamtangan aduna pay mokabat 888 ka mga pamilya nga walay puloy-anan sukad mihapak ang bagyo tuig 2011 ug pinaagi sa maong donasyon maubos ubusan ang ihap sa pamilya nga mahibilin ug pangitaan na lamang og paagi nga mahatagan.

Gipaningkamotan karon sa DSWD nga mapaspasan kini ug masugdan ug tukod sunod bulan kini aron mahatagan og saktong mapuy-an ang mga pamilya nga balidong apektado gyod sa sendong nga anaa sa ilang listahan.(SVB)