Carmelo D. Lariosa

Panadtaran, San Fernando, Cebu

Wa ko kasabot sa akong gibati dihang nasayran ko

Nga wala na diay ikaw sa walog nga napuno

Sa mga bulok sa arte. Ang awit ug balak imong

Gibilin dinhi ning kahilom. Mga alibangbang idlas

Imo nang nadakpan ug bisag laya na imong tanaman

Lunhaw pa gihapon ang awit sa mga langgam

Nga mabati dinhi sa tanaman sa among kaudtuhon.

Nagkasakay kita niadto sa Bus. Imong gipabati nako

Ang way kamatayon mong gugma sa panulat.

Miingon ko nga ang kinabuhi usa ka panaw

Sama sa nagdagang Bus nga atong gisakyan.

Mipahiyom ka nga nabusog sa akong dalit

Nga gidagayday sa tubig sa batan-ong hunahuna

Nga may dalisay nga pagbati. Nakita ko sa mga mata mo

Ang duha ka panamilit: una, ang imong pagpahuway

Sa imong kaakuhan; ikaduha, ang imong pagbiya

Nga wala nay pagbalik.

Dinhi ning walog sa mga buhi, Noy Bart,

Dili nako mahikalimtan ang imong buhing daghong

Nga gisambog diha sa imong way kapuol nga gugma

Nga giluparan og usa ka libo ug usa ka mga kabakaba

Nga naglupad-lupad libot sa imong sinulat nga balak

Ug sugilanon nga napatik sa mga panid sa mantalaan

Nga maoy buhing handumanan sa imong pagka ulipon

Sa dagang.