GIKATAKDANG mobiya karong Pebrero 15 ang Cagayan de Oro City Police Director nga si Police Senior Superintendent Ronnie Francis Cariaga.

Kini ang gikumpirman ni Police Superintendent Lemuel Gonda kinsa bag-ong tigpamaba sa Police Regional Office (PRO)-Northern Mindanao human nag schooling si Police Superintendent Surki Sereñas.

Gibutyag ni Gonda nga mobalik sa dakbayan ang kanhi city director nga si Police Senior Superintendent Gerardo Rosales kinsa deputy director sa PRO-Northern Mindanao. Ang turn-over ceremony mahitabo sa adlawng Miyerkules, Pebrero 15.

Wala na mihatag og rason si Gonda sa pag-relieve kang Cariaga sa pwesto apan daw kamandoan kini sa ilang dako sa Philippine National Police.

Gikatakdang madestino si Cariaga sa Mimaropa nga gilangkuban sa mga probinsya sa Marinduque, Occidental and Oriental Mindoro, Romblon, and Palawan. Wala pay pamahayag si Cariaga kalabot sa iyang pagkabalhin sa pwesto.

Hinuon gibutyag sa pipila ka mga polis sa Cocpo nga nahinabi sa SuperBalita nga dili na bag-o alang kanila nga lain-lain ang ilang Director ug andam sila kanunay sa laing adjustment.

Daw positibo usab ang pagbalhin ni Cariaga gumikan kay bag-ohay lang kining giilang usa sa labing maayong city director sa nasod ug ang kahibalo niini dako og tabang sa balhinan niining rehiyon.

Sa laing bahin si Police Senior Superintendent Tyron Masigon na usab ang bag-ong provincial director sa Bukidnon samtang si Police Senior Superintendent Reynaldo Pedulla ang balik sa PRO-Northern Mindanao.