PATAY ang usa ka gidudahang ‘asset’ sa kapulisan human kini gipusil samtang natulog likod sa ilang balay, pasado alas 9 sa miaging gabii sa sityo kamansi, Barangay Lorega-San Miguel, dakbayan sa Sugbo.

Ang samdan sa iyang suwang nga milapos sa luyo sa iyang ulo mao si Jingle Mabaga, 28, ulitawo nga nagpuyo sa maong dapit.

Mipusil kaniya ang duha ka wa hiilhing tawo nga nagsakayg motorsiklo.

Sa imbestigasyon ni PO3 Romel Bancog sa Homicide Section gibutyag sa mga igsuon sa biktima nga sila si Jinky ug Joan nga naabot ang duha ka wa mailhi nga tawo ug midiritso luyo sa ilang panimalay ug dayong pusil sa biktima.

Human sa mga buto sa armas daling misakay og balik sa ilang motor ang duha ug misibat.

Ang biktima gidala sa Cebu Medical Center apan gideklarar nga dead-on-arrival.

Dugang nasayran gikan ni Jinky nga nianang buntag dihay wa mailhi nga tawo nangita sa iyang igsuon, apan niadtong tungora wa diha ang biktima.

Nasayran usab sa Homicide Section nga gidungog nga asset sa kapolisan si Mabaga.