MOKABAT sa 52 na ka mga drug operation ang gihimo sa nagkalain-laing istasyon ug unit sa Cagayan de Oro City Police Office (Cocpo) apan walay bisan usa nga drug suspect ang namatay sa maong operasyon.

Kini ang gibutyag ni Cocpo spokesperson Mardy Hortillosa ug dugang pa niini nga ilang paninguha karon nga walay mapatay sa operasyon ug ila kining gitun-an og mayo.

Ang ika-duhang hugna sa drug operation kon Oplan Tokhan ug Project Double Barrel ang gisugdan niadtong Marso 1 ug hangtod niadtong March 15 moabot na sa 52 ka mga operasyon diin 47 niini ang pinaagi sa drug bust ang natigayon ug walay bisan usa nga napatay sa operasyon.

Matud ni Hortillosa nga naningkamot ang ilang buhatan nga ang mga biktima mosurender ug labaw sa tanan dili mosukol aron walay dugoun nga mahitabo sa operasyon.

Gani niadtong pagsira sa semana nagkadaiyang operasyon ang gihimo sa kapolisan diin moabot og kapin milyon ang nasakmit nga gitouhang shabu gikan sa dinakpan. (SVB)