LABIHAN ka hugot ang seguridad nga gipatuman dili lamang sa kasundalohan apan lakip ang kapolisan sa pagbisita ni Presidente Rodrigo Duterte niadtong Dominggo, Pebrero 5, diha sa 4th Infantry Division Philippine Army (4ID) sa Camp Evangelista, Patag, dakbayan sa Cagayan de Oro.

Gibutyag sa 4ID spokesperson Joe Patrick Martinez nga nakigkoordinar sila sa kapolisan sa Police Regional Office-Northern Mindanao aron motabang sa seguridad labina gayud sa mga dalan nga giagian ni Duterte.

Gikalipay usab sa mga sundalo ang pagbisita ni Duterte tungod kay daw naghatag kini og dakong moral ug kadasig nga himoun ang ilang trabaho taliwala sa nahitabo sa tulo ka mga sundalo nga gipatay didto sa Bukidnon.

Gibutyag ni Martinez nga nalipay sila sa suporta nga gipakita ni Duterte ngadto sa ilang han-ay ug iyang nalantaw nga dako ang concern niini sa kasundalohan. (SVB)