IGACOS, Davao del Norte - Patay na nga miabot sa ospital ang usa ka lalaki kinsa misukol sa pulis dihang giharang sa kalsada kay nagdala kini'g armas.

Ang insidente nahitabo alas 10:30 sa buntag niadtong Huwebes didto sa Sitio Buhangin, Barangay Tagbaobo, Island Garden City of Samal (Igacos).

Ang suspek mao si Oscar Andrade Buragay, 55, nagpuyo sa dapit kinsa nakuhaan og usa ka kalibre .45 nga pistola nga dunay duha ka mga buhing bala ug upat ka pakite sa gituohang shabu.

Nasayran nga nagpahigayon og pagpanubay sa ilang AOR si Senior Inspector Joselito Tan Jr., ubos sa superbisyon ni Supt. Noel Asumen, hepe sa Igacos Police Station.

Giingong ming-over take si PSI Tan ngadto sa suspek human nakita ni Tan nga dunay gitakin nga pusil ang suspek, apan inay mohunong gipabuthan si Tan sa suspek hinungdan nga na-neyutralisa kini.

Nadala pa ang suspek sa Davao del Norte Hospital-Samal Zone sa Barangay Peñaplata apan gideklara kining dead on arrival.

Ang suspek giingong usa sa mga pinangita sa kapulisan sa Igacos gumikan sa ilegal nga buhat.